冇咗恩哈路　曼聯翻兜昔日青訓射手

集多媒體分析、最強資料庫及第一手資訊於一身，即上《彩報》：

https://win.on.cc/football/video.html　

曼聯同上海申花傾唔掂數，意味借將恩哈路將於5月31日借用期滿後，就會重返上海申花。據悉，曼聯已經有第2手準備，就係收購般尼茅夫射手祖舒亞京治，填補鋒線空缺。

其實曼聯喺1月已經向般尼茅夫提出，以2000萬鎊收購祖舒亞京治，但般尼茅夫嫌價錢低而拒絕放人，結果紅魔鬼改為向上海申花借用恩哈路，當時祖舒亞京治都話好失望。

由於呢位28歲挪威國腳只剩下1年合約，加上佢對般尼茅夫阻礙自己成魔，感到不滿，而萌生去意，同埋般茅好可能降落英冠，已經冇本錢再將佢吊高來買，預料曼聯今次再出價2000萬鎊應該可以得手。

祖舒亞京治出身於曼聯青年軍，2009至13年效力曼聯期間只曾上陣2次，大部份時間被外借，之後轉投布力般流浪，5年前加盟般尼茅夫。祖舒亞京治至今為般尼茅夫上陣163次，射入48球，包括今季英超入咗4球。

據悉，仲有4支英超前列球隊有興趣簽祖舒亞京治，曼聯係買就要快手。