專欄輪住嚟 唔大鑊!只係有少少傷感啫

2020年06月07日 08:00
東網電視
更多新聞短片
一代香港隊中鋒「陳7」,要改口叫佢「陳經理」。
「『大頭』!大鑊呀!『陳7』退役畀人寫咗呀!」一起身就聽到同事Sent嚟嘅Whatsapp。其實「陳7」喺上年「東亞運10周年」嗰陣,已經喺facebook透露咗自己有退役嘅打算,今年大年初一《港超專版》嘅球圈鼠年運程特輯,亦有講佢計劃掛靴,而我喺講波嗰陣,亦都最少講過兩次佢會喺今季之後唔踢,所以我一啲都唔覺得大鑊,只係有少少傷感,因為呢一日終於要嚟喇。
「『7記』,個專訪好好睇呀!」「嘩!唔係詐我型嘛,哈!哈!」當然唔會亦冇得詐型,反而好想知佢堅做咗退役呢個決定之後,佢有咩感受啫。「話一啲都冇唔捨得,就係呃人嘅,踢咗咁多年又點會就咁就放得低呀?不過,每一個職業球員點都有退落嚟嘅呢一日,係差在早定遲嘅啫。難得老細支持,有機會喺第個範疇發展,咪趁呢個機會轉囉。」現職飲食及娛樂集團營運經理嘅「陳7」咁講。
由於香港飛馬退出咗下半季賽事,所以今年3月21日香港飛馬0比5不敵東方龍獅嘅「足總盃」,已經係決定咗退役嘅「陳7」嘅最後一場賽事。但一代香港隊中鋒,唔係冇場告別賽吖嘛?「我冇特登去問,老細有講過吓,佢會為我安排㗎啦!仲有唔好話我掛靴或者退役,因為我應該會繼續踢甲組,只係唔再踢港超聯啫。」咁睇嚟,新一季甲組繼上季嘅「偉豪」之後,將會出現新一輪嘅「陳7爭奪戰」。
「陳經理」依家嘅工時比做職業球員嗰陣長好多,但做咗一段時間嘅佢,已經開始慢慢適應咗。但係想同有咗3個月身孕嘅老婆大人,同埋寶貝仔Klay天倫樂,就冇之前咁易就到時間喇。「佢兩個都會明白嘅,工作辛苦啲,都係想將來一家4口(不排除更多口)生活好啲,做老公、做老竇係咁㗎啦!」咁啱喇,要搵定多啲奶粉錢,嚟緊港超聯重開幫手講波囉。「吓!你唔係唔預我吖嘛?我預咗同你一齊喺直播嗰陣爆料㗎喎!」嗱!「陳7」當你應承咗喇,唔好好似「偉豪」咁,呢頭做晒證,嗰頭又話有班落呀!
大頭