基亞利殊1場被踢9次　創英超紀錄

即上英超刨績王：https://win.on.cc/football/league/epl/rank.html　

阿士東維拉喺英超主場1比2不敵車路士，不過中場球星基亞利殊表現依然搶鏡，呢位「維拉柏豪」今場成為車路士殺傷戰術目標，全場被車路士球員9次侵犯，創下今季單場被侵犯次數最多紀錄，而佢今季累積被侵犯128次，更成為英超史上1季內被侵犯次數最多球員紀錄，果然係惹火尤物！

基亞利殊今場雖然被安排踢左中場，但仍然成為車路士球員攻擊目標，全場雖然只係觸球36次，但已經9次被侵犯，最諷刺嘅係冇車路士球員因為踢佢而攞牌，反而係基亞利殊完場前忍唔住爆粗鬧車仔球員而領黃牌。1場波被侵犯9次，係自2017年5月嘅水晶宮翼鋒韋費特沙夏後(10次)，英超3年來單場被侵犯次數最多紀錄，而且今季英超仲有8輪未踢下，基亞利殊累積128次被侵犯已經創下英超史上1季被侵犯最多次紀錄。

雖然基亞利殊今季表現神勇，可惜阿士東維拉輸波後仍然排喺尾2，下季隨時要降落英冠比賽，而基亞利殊已經受到曼聯等豪門垂青，有網民就留言話：「1個(基亞利殊)係英超被侵犯最多球員、1個(曼聯)係英超拎最多12碼球隊，天作之合！」