專欄輪住嚟 期待比科蘭更哄動嘅驚喜
星期三嘅足總董事會,應該都好多嘢要傾同好多手尾要執,所以個會暫定朝早10點就開喇。其中要傾嘅,就係推翻上次嘅決定,等新一季可以行「註6岀5」嘅外援名額。
相信大家都知道,大部分球會贊成用一季嘅「註6出5」,第5個外援一定要係國腳級或者喺踢過高水平聯賽嘅,目的除咗加強賽事嘅水準,提升關注度亦都好緊要。大家可能會覺得呢種「目標外援」唔易搵,認為踢得嘅都唔會肯嚟港超,或者踢得嘅港超球隊都未必請得起,但實際情況應該就唔係咁喇。
其實喺科蘭嚟香港踢傑志之前,印度、印尼、馬來西亞等等嘅亞洲二、三線聯賽,已經有好多曾經喺歐洲主流聯賽踢過同威過嘅國腳級外援亮相,好似皮利斯、艾辛、艾馬同費古路亞等等,雖然年紀有番咁上下,但名氣夠大、個朵夠響,要佢場場搏足90分鐘未必得,但踢半場呢,絕對起到「加強賽事嘅水準同提升關注度」嘅作用。喺亞洲球壇好早已經有專門為呢啲「國腳級名將」搵班落嘅Agent存在,早兩年如果有會肯簽,巴路士同基拿甸奴可能已經嚟咗踢港超喇。
當然,港超球會有啲都好多路數,唔搵上邊講嗰類,都可以搵到例如喺澳職、韓職或者日職踢過,有名氣同有料到嘅老將,冇咁貴之餘,話晒都喺亞洲踢開波,適應唔會有問題。所以假如新一季真係行到「註6岀5」嘅,相信好幾隊都會帶到啲驚喜畀大家嘅!話唔定仲哄動過當年科蘭呀!
大頭