【有片】逆向進化論!拉莫斯轟入罰球

20200625
東網電視
更多新聞短片
立即去片睇拉莫斯轟入罰球https://bit.ly/2YwujUD 
皇家馬德里後衞沙治奧拉莫斯「進化」成射手,佢喺周四(25日)凌晨西甲,射入1球「碧咸式」靚絕罰球,亦係「銀河艦隊」相隔528日再次有球員射入罰球,並以2比0擊敗馬略卡,升上榜首。
皇馬今場由雲尼斯奧斯祖利亞入波打開紀錄,但主角始終係沙治奧拉莫斯,佢喺禁區頂中央位置主射罰球,直飛上角入網,有角度又有勁度,馬略卡門將文洛奴雷拿得個望字,反應唔切做撲救動作。
沙治奧拉莫斯近4場西甲射入3球,今季各項賽事累積入10球,當中聯賽佔8球,成為陣中次席射手,僅次於賓施馬,問你服未。
拉莫斯出道至今已累積入120球,其中以69球成為西甲史上入波最多嘅後衞,佢以往多數入波都係靠頂入死球或者射入12碼,估唔到連射罰球都有一手,今次係佢球員生涯第2次射入罰球,上次係2014年5月華拉度列一役射入。
皇馬自C朗離隊後,一直缺少1位罰球專家,球隊對上1次有球員入罰球,已經係2019年1月對貝迪斯,當時丹尼施巴路斯射入罰球以2比1絕殺對手。沙治奧拉莫斯晉身「罰球專家」行列,皇馬又多一種破門武器。
皇馬現時同巴塞隆拿同分,對賽成績方面,皇馬取得1勝1和佔優,只要贏晒餘下7場聯賽就可以捧盃。