【官宣】祖雲達斯巴塞隆拿世紀交易

20200630
東網電視
更多新聞短片
巴塞同祖記世紀交易
蘊釀差唔多3個月之後,祖雲達斯同巴塞隆拿嘅世紀交易終於落實,祖雲達斯周二(30號)宣布用7,200萬歐元簽入巴塞隆拿中場艾法美路,簽約5年;巴塞隆拿隨後亦宣布用6,000萬歐元收購祖雲達斯中場比真歷,簽約4年,實現疫情爆發後球壇最值錢嘅一單轉會交易。
呢單中場換中場嘅交易,引嚟球迷熱烈討論,祖雲達斯放棄陣中最具創造力嘅中場,不過比真歷今季明顯適應唔到新帥沙利嘅踢法,逼搶能力同活力較好嘅艾法美路顯然更加啱踢,至於巴塞隆拿逼走「新沙維」艾法美路,換入年齡大7歲嘅比真歷無疑係兵行險著,但比真歷嘅創造力同傳球視野,亦係巴塞中場所欠缺,可以大大減輕美斯嘅壓力。
不過更重要嘅係,財政上呢單交易係「雙贏」,雖然實際操作上係球員交換,祖雲達斯只要支付1,200萬歐元轉會費,不過喺歐洲足協嘅財政公平條例下,兩間球會都可以各自申報6,000萬歐元同7,200萬歐元收入,喺疫情打擊財政情況下,大大增加之後轉會交易嘅空間。
另外,祖雲達斯宣布,與老牌門將保方及中堅基亞連尼續約1年,2位老臣子來季繼續征戰意甲。