曼聯雙核又出動 白禮頓頂到幾耐?

2020年06月30日 12:00
東網電視
更多新聞短片
白禮頓 Vs 曼聯
近期狀態回勇嘅曼聯,周三凌晨英超將會作客白禮頓。「紅魔鬼」目前喺英超排第6位,落後第4位嘅車路士5分,剩低每場比賽都唔可以有任何閃失,作客出戰會較為謹慎;主隊白禮頓逐步遠離降班區,主場務求有分落袋提早「上岸」,面對強敵曼聯會以1分為目標,今場必定先求穩守,半場和值得一博。
(Now 621及611周三凌晨3時15分直播)
白禮頓復賽之後狀態唔差,先喺主場2比1反勝阿仙奴,再作客0比0守和李斯特城,喺兩支勁旅身上搶走4分,令護級前景一片光明。今場迎戰氣勢如虹嘅曼聯,如果可以拎到分數已經算有交代,對護級亦好有幫助,相信踢法上會比較保守。
事實上,白禮頓球員效率頗高,尤其上半場體能充沛嗰陣,對手更難撕破佢哋緊密防線,過去5場聯賽全部開半場和,包括近4場半場都同對手踢成0比0。而且白禮頓球員之前受過屈辱,據英國傳媒報道,白禮頓一班球員被阿仙奴嘅古安杜斯直指為「低薪垃圾」,因此對阿仙奴一役完場後引發小衝突,為挽回面子,相信白禮頓球員搶分護級決心更加堅定,令今場對手曼聯想入波更添難度。
曼聯剛戰英足盃未回氣
作客嘅曼聯復賽後2場聯賽1勝1和,保羅普巴同波基斯費南迪斯上輪聯賽首次同時正選上陣,效果良好,不過白禮頓已有所警惕,勢必針對性屯重兵布防,曼聯未必能夠再予取予攜,何況「紅魔鬼」啱啱喺英足盃同諾域治踢足120分鐘先分出勝負,球員體能必受影響,加上曼聯今季作客表現不穩,近5場聯賽作客只得1勝,對住防守緊密嘅白禮頓不敢輕率搶攻,半場和好路。
名家:工廠仔
預計陣容
白禮頓
1馬菲賴恩
2蘭普堤 15阿當韋斯達 5李維士鄧克 33丹般恩
24戴夫普巴 8比蘇馬 6達爾史堤芬斯 18阿倫穆爾
17格連梅利 44艾朗干洛尼
曼聯
1迪基亞
29雲比沙卡 2域陀連迪路夫 5哈利馬古尼 23勞基梳爾
6保羅普巴 31尼曼查馬迪 18波基斯費南迪斯
21丹尼爾占士 9安東尼馬迪爾 10拉舒福特