恩沙基率賓尼雲圖升班 同細佬鍊過!

2020年06月30日 13:03
東網電視
更多新聞短片
意乙首支升班球隊誕生!由意大利名將恩沙基執教嘅賓尼雲圖,周二(30號)凌晨主場1比0擊敗祖雲施達比亞後,正式宣布提前7輪奪得意乙冠軍,並且確定下季重返意甲。恩沙基細佬施蒙尼恩沙基執教嘅拉素,目前正爭逐意甲冠軍,兩兄弟下季可以喺意甲鬥法,認真精彩!
賓尼雲圖今季31場聯賽贏23場,拋離次席嘅克羅托內24分之多,提前7輪升班嘅成績,亦追平阿斯科利喺77/78球季創下嘅意乙紀錄。賓尼雲圖喺17/18球季曾經征戰意甲,亦係球會創立91年來唯一一季征戰意甲,恩沙基今次帶領球隊再戰意甲,當然唔想再做「升降機」。
據報賓尼雲圖已經火速展開組軍工作,效力里爾嘅33歲法國前鋒雷米周二已飛抵意大利,完成體測之後就會以自由身加盟;意大利《天空體育》亦指賓尼雲圖正同摩納哥中堅基歷克斟介,同時睇中依家由多蒙特外借莫斯科斯巴達嘅德國前鋒舒賀爾尼。