阿仙奴簽巴西猛人　朗拿度尼馬當佢係「神」

即上英超刨績王：https://win.on.cc/football/league/epl/rank.html　

阿仙奴今個夏天面臨換血，據英國權威媒體《The Athletic》報道，球隊首席理療師基斯摩根，已經被新科冠軍利物浦成功挖角，闊別2年後回歸「紅軍」懷抱，不過阿仙奴亦唔執輸，據報佢哋已經簽入巴西人氣軍醫馬斯奧迪，呢位猛人來頭極大，連朗拿度、尼馬都當佢神咁拜！

43歲嘅大隻軍醫馬斯奧迪目前效力巴黎聖日耳門，之前效力哥連泰斯、巴西國家隊以及短暫加盟山東魯能，今個夏天離開法甲後，應阿仙奴總監伊度邀請將會加盟阿仙奴。馬斯奧迪喺巴西享負盛名，喺哥連泰斯曾經將陷於收山邊緣嘅柏圖、朗拿度同連拿度奧古士圖「翻生」，朗拿度08年喺AC米蘭膝部重傷後被放棄，原本要抖6至8個月，但馬斯奧迪治療下4個月就復出；另一經典係尼馬加盟巴黎聖日耳門首季，喺2018年2月跖骨骨折，一度以為會緣盡18世界盃決賽周，但馬斯奧迪幫佢神速康復，尼馬更喺世界盃揭幕戰踢足90分鐘。

阿仙奴嘅傷兵問題近年一直非常嚴重，或者馬斯奧迪可以為「兵工廠」妙手回春。