貝迪斯向史坦恩招手　巴塞再亂啲

即上韓職刨績王：https://win.on.cc/football/league/kd1/rank.html　

巴塞隆拿復賽後連場失分，喺西甲由領先跌落第2，隨時畀死敵後上捧盃，本已平息嘅內亂又爆發，教練團同球員關係緊張，今年初上任嘅史坦恩受晒，如此局面之下，史坦恩舊主貝迪斯突然向佢招手，話歡迎佢來季回巢執教，此言一出，巴塞內部亂上加亂。

停擺前領先2分嘅巴塞，喺復賽後連續2場作客賽和西維爾及切爾達，結果被復賽後全勝嘅皇馬反超前2分，主帥史坦恩即時成為箭靶，消息指球員認為欠領軍能力，美斯更當佢透明。

消息指，史坦恩曾於2017至19年執教貝迪斯並取得成功，之後和平離隊，同貝迪斯保持良好關係，依家見到史坦恩喺巴塞發展唔如意，立即向外表態，表示隨時歡迎呢位61歲教練回巢。

事實上球王美斯一直屬意由前隊友沙維執掌巴塞，但沙維表示想喺卡塔爾浸多一年，明年夏天等巴塞會長巴度美奧落台，佢先會返嚟執教，如果史坦恩真係頂唔順劈炮，出年巴塞可以搵邊個教？