韋婉婷「試用期」搞掂!期待榜首大戰來臨

2020年07月01日 00:26
東網電視
更多新聞短片
(Graeme提供圖片)
上月中隻身飛赴阿爾巴尼亞,投效聯賽勁旅維拉斯尼亞(Vllaznia)的香港隊球員韋婉婷「韋婉」,經過在操練和連場賽事中的努力,終獲得維拉斯尼亞會方和主帥的認可,官宣「試用期」合格,雙方將簽約至今季尾。「韋婉」為此表示欣然,並會繼續努力先迎接下輪的聯賽榜首大戰,之後再放眼歐聯。
感謝本地資深傳媒人Graeme,飛赴阿爾巴尼亞探訪「韋婉」,為香港球迷帶來更多該名香港隊主將在當地的消息。「韋婉」在當地時間周二(30日)下午的聯賽,為維拉斯尼亞正選上陣鬥Maliqi,雖然未有錄得入球和助攻,但在整個上半場都現活躍。最終維拉斯尼亞以14比0大勝對手。
賽後,「韋婉」接受Graeme訪問時表示:「我同球會應該會簽約到季尾,只要球隊在聯賽能夠保持長勝,我應該有機會挑戰之後嘅歐聯。初初嚟嗰陣,因為得我一個人,都有少少淆底。初頭練波都唔係太適應,但慢慢都OK,亦都冇諗太多其他嘢。教練希望我可以喺賽事度做多啲傳送,呢場上陣嘅45分鐘,都應該達到要求啩!」
「下一輪就會對聯賽嘅第二位球隊,一定係一場硬仗,好期待可以上陣,同感受吓隊友之外,有番咁上下實力嘅對手,有幾硬淨同幾難應付,非常非常期待!至於之後點,呢一刻唔會諗太多喇。嚟咗之後,樣樣嘢都算順利,我都好享受。」「韋婉」補充謂。
都係嗰句,「韋婉」,畀心機呀!