格連活特複製「大哨」入球！直逼朗尼紀錄

即上英超刨績王：https://win.on.cc/football/league/epl/rank.html　

曼聯作客以3比0擊敗白禮頓，除咗梅開二度嘅波基斯費南迪斯之外，今場出任正選嘅18歲新星格連活特表現亦非常搶眼，射入1球及貢獻1次助攻，佢嘅入波更似足巴西傳奇射手「大哨」朗拿度嘅招牌式入球。

當時格連活特於右路盤球突破，殺入禁區之後，面對白禮頓3位球員夾擊，佢做出兩次「插花」假動作，呃過對手後再射入，呢招正係「大哨」全盛時期最煞食嘅射門，年紀輕輕嘅格連活特已具備呢種級數嘅射術，的確令人驚喜。

格連活特今季各項賽事已經射入13球，就算另1位曼聯天才射手拉舒福特19歲前，亦只為紅魔鬼入12球。

同埋格連活特今季英超已有6球進帳，根據OPTA統計，佢成為自2003/04年球季嘅朗尼之後，第1位可於單季英超入到6球嘅18歲球員，當年朗尼效力愛華頓，入咗9球，格連活特今季仲有機會超越呢位曼聯名宿。