華倫怒炒教練!前巴塞主帥等接手

2020年07月01日 12:01
東網電視
更多新聞短片
(Getty Images)
西甲老牌勁旅華倫西亞宣布,解僱44歲球隊教練施拿迪斯。呢位前西班牙U21教練之前受訪時表明無意辭職,仲同傳媒大派「定心丸」,話好有信心帶領球隊走出低谷,同埋會帶領球隊出戰周四(2日)凌晨西甲,不過班主一於懶理,去年9月上任嘅施拿迪斯僅僅執教咗9個月,就要同體育總監施薩山齊士一齊執包袱走人,有傳前巴塞隆拿教練華爾維迪可能接手成為新主帥。
華倫西亞復賽之後嘅5場比賽只喺贏得1場,唔止輸畀皇家馬德里同維拉利爾等前列份子,對住伊巴等中下游球都唔可以全取3分,跌咗落第8位,咁嘅表現對爭取緊歐洲賽資格嘅華倫西亞絕對唔收貨!
現時由禾路干沙利斯擔任看守教練,第6次作為臨時教練嘅佢經驗老到,喺2008年頂替朗奴高文幫助球隊成功護級。
據悉,前巴塞隆拿教練華爾維迪同助手近日已經喺華倫西亞所在城市巴倫西亞搵新居,似準備接手執教。
56歲華爾維迪率領巴塞連續2季西甲冠軍,但今年1月被炒,佢曾於2013/13年球季中途執教過華倫西亞,對呢支「蝙蝠兵團」並不陌生。