英超3強分途出擊 歐聯席位追逐戰

2020年07月01日 14:00
東網電視
更多新聞短片
李斯特城、車路士、阿仙奴分途搶W
擺鐵桶陣搶分
韋斯咸細抗車仔
今晚英超「倫敦打吡」,力求護級嘅韋斯咸主場鬥車路士。貴為今季「倫敦打吡王」,車仔照計對住邊支同市球隊都唔怕,但偏偏對住韋斯咸就老鼠拉龜,近5次交手全部總入球開2球或以下,而且車仔只獲1勝2和2負,今場作客點都有啲戒心,唔會亂嚟,客勝有風險,寧捧中位數2.5球入球細。(Now 621周四凌晨3時15分直播)
車路士復賽後連場大戰,雖然先後於聯賽擊敗維拉及曼城,再喺英足盃淘汰李斯特城,但值得留意嘅係,佢哋全部僅以1球取勝,體力上已有不及,踢起嚟亦就住就住,始終復賽之後賽事頻頻,球隊上下要懂得留放。
近5次交手全開細
車仔乃今季「倫敦打吡王」,7戰同市球隊獲5勝1和1負,入12球失6球,相反韋斯咸今季「倫敦打吡」戰績,只得2勝6負,得9球失14球,不過2場勝仗當中,偏偏就包括去年11月尾作客史丹福橋,以1比0擊敗車仔,吸取過教訓,相信車路士今仗不敢過分冒進,肯定會步步為營。
韋斯咸聯賽重開後連輸2場,仍然喺護級漩渦中掙扎,面對同市強隊必定大踢穩守突擊戰術,幸好對住車仔往績唔輸蝕,近5次交手有3次可以保持不失,呢5場總入球均少於3球,相信韋斯咸會照辦煮碗,擺鐵桶陣迎接車仔,捧中位數2.5球入球細啱數。
阿仙奴乘勇速捕金絲雀
周四凌晨英超多場大戰,其中阿仙奴將會主場迎戰諾域治,「兵工廠」自復賽後經歷連續4場作客比賽,今場係首次回歸主場酋長球場出戰,乘住近期連勝復甦走勢,必定希望打響頭炮。阿仙奴一眾新星近期開始入局,今仗可借主場之利向諾域治施加極大壓力,大有機會早開紀錄,半場主勝抵玩!(Now 621周四凌晨1時直播)
諾域治作客例由頭輸到尾
阿仙奴復賽頭2場聯賽輸波後,上輪作客修咸頓終於重響勝鼓,喺英足盃更絕殺錫菲聯殺入4強,令士氣大大提升,尤其「兵工廠」仍要搶分爭奪歐洲賽資格,每場勝仗都非常重要。阿仙奴2名青訓球員尼基迪亞同祖爾韋洛克上場聯賽入波,一眾新人表現落力,今仗主場出擊戰意高昂,落到場肯定逼搶對手務求盡早開紀錄。
排包尾嘅諾域治持續態沉,復賽後連續2場主場聯賽輸波兼1球不入,來季極大機會降落英冠。主場尚且連敗,「金絲雀」作客成績更加差勁,近5場聯賽作客1和4負,4次輸波都係喺半場已經落後,今場捧阿仙奴半場主勝為明智之舉。
李城冇火吼半和
復賽後狀態未如理想嘅「狐狸」李斯特城,今晚英超將會作客「拖肥糖」愛華頓。李城前鋒占美華迪腳風欠順,令球隊進攻力大減,對住由安察洛堤執教後防守力大大提升嘅愛華頓,戰況隨時膠着,半場和值博。(Now 622周四凌晨1時直播)
愛華頓守強過攻
李斯特城近2場聯賽都打和失分,連同復賽前5場只得1勝,近7場英超成績係1勝4和2負,現時雖然仲頂得住排喺聯賽榜第3位,但隨後嘅車路士、狼隊及曼聯等已經慢慢追上嚟。李城現時最大嘅問題係射手榜暫時領先嘅占美華迪,踏入2020年後表現走樣,今年只曾在1場聯賽入過波,冇咗「華Dee」入波,「狐狸」即時惡唔出樣,穩守突擊打法變成只守難攻。
雖然李城火力減弱,然而由卡斯柏舒米高、蘇恩古等領導嘅防線仍然可靠,近6場聯賽只失3球,對手要攻破佢哋都唔容易,因此李城近7場聯賽有6場開出半場和。主隊愛華頓復賽後2場1勝1和,而且未失1球,同樣屬於守強過攻,預料雙方今場都會先穩守,半場和好路。