普巴波費齊入波　曼聯炒維拉創英超紀錄

即上英超刨績王：https://win.on.cc/football/league/epl/rank.html　

氣勢如虹嘅曼聯，周五(10號)喺英超又拎到大勝，作客以3比0擊敗阿士東維拉，依家只係落後第4位嘅李斯特城1分，距離第3位嘅車路士亦只係2分，大有機會拎到下屆歐聯資格。曼聯連續4場以3球或以上比數大炒對手，更加寫下英超新紀錄。

曼聯今場喺27分鐘由波基斯費南迪斯射入12碼先開紀錄，完半場前美臣格連活特增添紀錄，58分鐘再由保羅普巴錦上添花，協助曼聯作客大勝3比0。自英超復賽後，曼聯除第1場波打和熱刺，之後分別3比0贏錫菲聯、3比0贏白禮頓、5比2贏般尼茅夫，連同今場已經連續4場聯賽贏3球或以上，係英超史上第1隊，而對上1次英格蘭頂級聯賽有球隊可以連續4場大勝，已經要數到1987年嘅利物浦。

曼聯領隊蘇斯克查賽後表示，有信心「紅魔鬼」會實現重奪英超冠軍願望：「我肯定曼聯可以挑戰冠軍，再次贏得英超冠軍，至於幾時可以做到，就要睇球隊中每一個人嘅努力，呢支球隊正不斷進步。」