「吸血鬼」轉性 注資2.1億鎊打救阿仙奴
20200710
東網電視
更多新聞短片
阿仙奴周五(10號)向倫敦證券交易所證實，佢哋下月將提早贖回之前興建酋長球場嗰陣發行、2029年到期嘅債券，價值約2.1億英鎊，而費用會由班主高安基以借貸形式「注資」，意味呢位球迷眼中嘅「吸血鬼」將會孭起阿仙奴起新球場嘅債務。
美國富商高安基經常被球迷批評借阿仙奴「掠水」，但自從2018年將阿仙奴私有化之後，高安基對球隊嘅財政支援不斷增加，今次佢「注資」為球會清除所有債務，可以大大舒緩阿仙奴喺疫情影響之下嘅財政壓力，阿仙奴信託基金會(AST)早前估計，如果下季英超繼續閉門作賽，阿仙奴虧損將會超過1億英鎊。
球迷最關心嘅，當然係今次注資對阿仙奴轉會市場嘅影響，事實上高安基今次注資嘅目的，並唔係為喺轉會市場買人，而係畀球會有更穩定同健康嘅財務狀況，不過「兵工廠」依家每年可以慳番大約2,000萬鎊「債務還款」，亦唔需要喺資金撥出每年3,000萬鎊嘅「還款儲備」，大大增加資金運用嘅靈活性。