曼聯歐霸又抽好籤 波費拎埋英超最佳
20200710
東網電視
更多新聞短片
即上英超刨績王：
周五晚（10日）同時進行歐霸8強抽籤，仍未踢16強次回合、但首回合領先緊寧斯5粒嘅曼聯，又抽到好籤，若果順利晉級，8強會對住哥本哈根對巴沙克舒希嘅勝方，行運行到落腳趾尾。其餘焦點8強戰，包括奧林比亞高斯對狼隊嘅勝方，硬撼西維爾對羅馬嘅勝方，8強會喺下月8日至11日舉行，由8強至決賽，則會移師中立場德國舉行，同樣採用單場淘汰制，決賽就會於8月21日喺科隆嘅萊茵能量球場舉行，而未完成嘅歐霸16強次回合，例如曼聯主場對寧斯，仍會喺番自己主場上演，至於16強兩回合都未踢嘅國際米蘭對基達菲、西維爾對羅馬，就直接改為一場過淘汰制於德國進行。
曼聯唔單止抽靚籤，近期聯賽又弗到冇朋友，最大功勞首推波基斯費南迪斯，佢憑住入4球兼交出1次助攻，當選上月英超最佳球員，由於聯賽中間停擺咗3個月，呢位喺2月同樣獲選嘅葡萄牙國腳，成為英超史上第7位連續獲得每月最佳嘅球員，旺氣逼人。