尼馬勾義嫂？驚爆搭上奇雲查普未婚妻

即上韓職刨績王：https://win.on.cc/football/league/kd1/rank.html　

朋友妻咪走雞！？意大利雜誌《Chi》爆料，尼馬同前巴黎聖日耳門隊友、德甲法蘭克福門將奇雲查普個未婚妻，巴西超模伊莎貝兒古拉特（Izabel Goulart）發展地下情！

《Chi》引述消息報道，溝咗葡萄牙、意大利血統嘅Izabel，同奇雲查普喺2018年訂咗婚，兩人原本今年計劃舉行婚禮，點知被疫情打亂晒。加埋奇雲查普要準備德甲復賽，兩人幾個月來一直分隔兩地，結果益咗尼馬乘虛而入，據講3個星期前佢兩個仲畀人發現去咗法國一個沙灘Happy。呢本雜誌仲言之鑿鑿咁話：「冇人會公開談論，呢個依然係秘密，但係尼馬同Izabel已經係一對嘞。」

35歲嘅Izabel同巴黎聖日耳門球員家屬私交甚篤，以前馬高華拉堤去度假都見到Izabel嘅身影出現。唔只咁，其實Izabel同尼馬前女友Bruna仲係閨蜜添，關係認真複雜。不過，喺《Chi》爆料之後，Izabel馬上喺社交網更新咗一則同奇雲查普嘅動態，意大利傳媒認為係一種對綠帽傳聞嘅低調回應。