普巴續約細節曝光！天價人工極震撼
20200716
東網電視
更多新聞短片
(Getty Images)
曼聯中場保羅普巴續約又行近一步，英國《太陽報》爆料，指紅魔鬼已經同呢位27歲法國國腳達成初步協議，雙方同意續約5年，普巴嘅人工將由現時29萬鎊周薪，大幅增加至40萬鎊周薪，預料會方將於7月底英超收咧後正式公布。
英超上月重開後，保羅普巴亦傷愈復出，並同新中場拍檔波基斯費南迪斯迅速建立默契，被譽為紅魔雙核，普巴唔止自己表現大為改善，連帶曼聯成績亦明顯提升。
早前已經傳出普巴想續約，領隊蘇斯克查亦表明希望留住呢位大將，即使上場對修咸頓，表現稍為失準，蘇B都全力為普巴講好說話。
既然雙方一拍即合，續約談判亦比以往順利好多，據悉新合約為期5年，證明雙方都想建立長期關係，普巴將來或者可以成為紅魔鬼一代標誌人物。
曼聯會方都好闊綽，願意畀普巴40萬鎊周薪，希望佢專心為球隊搏殺，換言之，普巴將會超越37.5萬鎊周薪嘅迪基亞，成為紅魔鬼新打工皇帝，佢冇理由再揸流灘。