專欄輪住嚟 一人一步,大家好做!

20200716
東網電視
更多新聞短片
馮凱文(左)與陳平在會議後,搭晒膊頭合照。
一人一步,大家好做!大埔體育會秘書長陳平,同球隊職、球員代表包括總監馮凱文、領隊Alan、助教陳旭智、球員陸平中、孫銘謙同埋杜瑋鴻,喺星期四(16日)就喺勞工處協調下,面對面、坐定定開咗第二次會,結果總算傾掂數,唔使搞到打官事。
雖然有份開會嘅幾位,都無好明確咁講到會議內容,只係喺會後拍晒膊頭話解決咗,但據講「條件」就同之前講過嘅差唔多,就係大埔體育會先出番3月未出嘅40%糧 (已經出咗),再出埋4月,同埋5月嘅50%糧,之後就大家同心合力向贊助商方面,追埋啲餘額包括未出嘅糧同埋獎金。聽講大部分球員都接受呢個方案,至於已經返咗去祖家嘅外援,會方稍後就會有專人去跟進,希望喺人哋嘅足總或者球員工會做嘢前,搞番掂佢。
搞咗一大輪,總算解決咗逼切嘅問題,職、球員總算袋番大半佢哋應得嘅人工,至於事件可唔可以圓滿解決,就要睇之後嘅發展喇,希望唔好搞到要告嚟告去就好喇。
原本計劃會喺8月過去南韓試腳嘅孫銘謙,因為疫情嘅關係,聽講應該成唔到事住,等遲啲安排好啲先再諗,而「孫銘」亦都已經同一隊好積極擴軍嘅球隊傾到7788。
睇到今次大埔球員喺疫情之下,既要追討欠薪,又要搵班落,其實都幾無助,「我撐本地波」好想為佢哋做到少少嘢,依家喺度籌備當中,有消息會再同大家講,希望大家到時可以多多支持。
大頭