4年3次決戰　阿仙奴車路士決賽冤家

即上英超刨績王：https://win.on.cc/football/league/epl/rank.html　

車路士3比1擊敗曼聯殺入決賽，8月1號將會同阿仙奴爭奪冠軍寶座，呢場「倫敦打吡」決賽球迷都見慣見熟，因為呢場將會係兩隊近19年第5次喺決賽爭霸，而且仲係近4年第3次，可以話係決賽冤家。

阿仙奴同車路士喺2002年英足盃決賽交鋒，「兵工廠」憑柏奴亞同龍格保入波贏2比0捧盃；5年之後英聯盃決賽，阿仙奴有禾確特先開紀錄，但車路士有杜奧巴連入2球反勝封王。

到近年兩隊更加有緣，2017年英足盃決賽，阿仙奴憑阿歷斯山齊士同艾朗藍斯各建一功贏2比1；上年歐霸盃決賽，車路士有倒戈嘅基奧特建功，加上夏薩特(2球)同柏度洛迪古斯入波大勝4比1。

呢4次決賽對碰，阿仙奴、車路士梅花間竹各贏2次冠軍，今次又係兩位「新丁」領隊林柏特同阿迪達執教生涯第1場決賽，邊個捧盃都可以創造歷史。