國米買斷山齊士 希望曼聯收順啲
科學鑑證，一口咬定，阿歷斯山齊士都係適合意甲，國際米蘭近日有意買斷山齊士，不過價錢方面希望曼聯再收順啲，將原價2000萬歐元減到1000萬至1500萬歐元左右，促成呢單交易。
「鋼琴佬」由阿仙奴轉投曼聯後，完全踢唔出水準，網民談論最多就係曼聯又做水魚，每星期支付山齊士50萬鎊周薪，搞到迪基亞同保羅普巴心理失衡，要求曼聯加人工。
自從山齊士外借到國米，曼聯家宅安寧，發展暢順，仲重返歐聯添，至於國米方面，山齊士近期喺意甲大爆發，干地對於呢位智利前鋒表現好滿意，因此希望買斷長用。
意大利傳媒報道，只要曼聯願意減價，國米就會買斷山齊士，而國米亦諗好山齊士嘅高昂薪酬問題，就係向政府提出減稅方案，將山齊士嘅人工支出減輕30%。