PSG勇奪「絕版」法聯盃　橫掃法國做3冠王

足球博彩神器，每日重心提供盡在《彩報》：http://win.on.cc/football/　

無敵是最寂寞！巴黎聖日耳門(PSG)周六(1號)凌晨喺法聯盃決賽，同里昂激戰120分鐘下踢成0比0平手，最終靠互射12碼贏6比5捧盃，繼贏得法甲同法足盃冠軍後，正式成為本土「3冠王」。

喺基利安麥巴比受傷下，PSG一直未能攻破里昂防線，加時最後階段里昂有後防拉菲爾達施華食紅牌，但對戰局冇做成影響，要用互射12碼決定冠軍。兩隊頭5名球員全部射入，去到「突然死亡」時間，里昂前鋒貝拿特查奧爾射門被救出，造就PSG嘅沙拉比亞射入致勝一球。

PSG今次捧盃意義重大，事關今屆係最後一屆法聯盃，賽會宣布由20/21球季開始無限期暫停呢個賽事，亦即係PSG最後一次成為本土賽事「3冠王」。連埋季前嘅法國超級盃在內，法國過去6季合共24個賽事冠軍，有21個落喺PSG手上，認真誇張。