伊利錫神秘返國唔踢歐聯　網上瘋傳戴綠帽

即上韓職刨績王：https://win.on.cc/football/league/kd1/rank.html　

意甲勁旅阿特蘭大今季表現神勇，今季入咗21球嘅靈魂人物伊利錫相當重要，不過呢位斯洛文尼亞中場自7月11日對祖雲達斯後忽然「人間蒸發」，雖然阿特蘭大一直擺佢喺「傷兵名單」，但缺席大半個月以來都係以「身體不適」為缺陣理由。據意大利《天空體育》報道，伊利錫近日以「處理私人事務」為由，獲阿特蘭大批准飛返家鄉斯洛文尼亞，球會已預計佢唔會出戰歐聯8強對巴黎聖日耳門嘅大戰。

伊利錫神秘缺陣兼飛返斯洛文尼亞嘅原因未被披露，不過網上瘋傳32歲嘅伊利錫患上抑鬱症，因為佢本來想畀老婆一個驚喜，偷偷飛返國探家人，點知入到屋發現老婆出軌，而且更加「捉姦在床」，傳聞更指伊利錫甚至考慮提早掛靴。資料顯示，伊利錫老婆叫Tina Polovina，兩人由拍拖到結婚已經11年，而且有2個囡囡，分別係4歲嘅蘇菲亞同2歲嘅維多莉亞。