【英足盃】仙車一樣咁愛!法比仔撐廠捧盃

2020年08月01日 14:26
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
兩大倫敦死敵阿仙奴同車路士,將於周日凌晨 (2日)爭奪英足盃,曾經打過呢兩隊嘅中場法比加斯,坦言阿仙奴更需要捧盃,但強調呢兩大倫敦球會都係佢至愛球隊。
對於兩大舊東家於英足盃決賽交鋒,現效力摩納哥嘅法比加斯話阿仙奴更需要呢項錦標,因為可藉此進軍下屆歐霸,相反車仔幾乎每年都捧盃咁濟,而且已肯定有份打歐聯,飢渴感唔及依家乜都冇嘅兵工廠。
33歲嘅法比加斯,於2003-2011年在阿仙奴成名,其後轉投巴塞,2014年佢重返英超竟加盟死對頭車仔,被「廠迷」視為二五仔,不過佢冇後悔,仲認為呢個係佢職業生涯最正確決定,因為兩次捧英超冠軍都喺車仔。法比仔話兩隊佢都咁愛,不過阿仙奴要踢得好睇,而車仔則只在乎贏波,唔介意踢得醜陋,呢點係兩軍文化上嘅差異。
2007年英聯盃決賽同樣係「仙車」之爭,當時阿仙奴反輸1:2,當時法比仔同車仔中場林柏特發生衝突,佢話自己嗰陣衰在太年輕同情緒化,依家已同林伯冰釋前嫌,仲話會考慮學林伯咁教波,不過佢會踢3至4年波先至再諗。