神奇！阿仙奴半個月擊敗3大冠軍得主

足球博彩神器，每日重心提供盡在《彩報》：http://win.on.cc/football/　

雖然阿仙奴今季英超僅排第8位，創下球隊近25年聯賽最低排名，但兵工廠踏入季尾遇強愈強，於7月中下旬先後擊敗利物浦同曼城，今場英足盃決賽再贏埋車路士，值得一提，利物浦係上屆歐聯冠軍及今季英超盟主，而曼城係上季英超冠軍，車路士又係上屆歐霸盃冠軍，換言之，阿仙奴半個月內擊敗3大冠軍得主，問你服未。

阿仙奴可堪稱為「英足盃之王」，佢哋曾經21次打入英足盃決賽，屬於英格蘭球壇史上最多，比第2位曼聯多1次，與此同時，兵工廠14次捧盃，亦係英足盃史上奪冠次數最多嘅球隊，比第2位曼聯多2次。

阿仙奴今次捧英足盃，仲間接打擊同市死敵熱刺，因為兵工廠可以直接晉身下屆歐霸盃分組賽，令到英超第6位熱刺由原本直入分組賽，搞到依家需要由第2圈外圍賽踢起。

狼隊亦成為受害者，無法透過英超第7位參加下屆歐霸盃，球隊必須奪得今屆歐霸盃冠軍，下季先至可以繼續出戰歐洲賽。