車路士4位大將有傷！難鬥拜仁

即上韓職刨績王：https://win.on.cc/football/league/kd1/rank.html　

車路士失落英足盃冠軍之餘，仲損兵折將，鋒翼基斯甸普列錫、後衞艾斯派古達都受傷退下火線，中場韋利安日前操練時受傷，加上尼高路簡迪仍有傷在身，4人可能缺陣8月9日凌晨歐聯16強次回合作客拜仁慕尼黑。

艾斯派古達今場踢到35分鐘就傷出，由安達斯基斯坦臣入替，而入波功臣基斯甸普列錫亦喺下半場初段受傷退下火線，領隊林柏特表示，2人拉傷肌肉，需要接受掃瞄，先至知道傷勢嚴唔嚴重。

中場主力韋利安今場連後備名單都冇份，原來佢喺早1日操練時撞傷肩膀，導致甩臼，至於另1位中場尼高路簡迪雖然有入選大軍名單，但並冇上陣，因為佢傷勢仲未完全痊癒。

車路士喺歐聯16強首回合主場0比3輸畀拜仁慕尼黑，如果次回合冇埋呢4位大將，車仔就更加難翻身。