無奈！C朗做觀眾睇恩莫比尼奪金靴

足球博彩神器，每日重心提供盡在《彩報》：http://win.on.cc/football/　

周日(2日)凌晨意甲最後1輪賽事，提早奪得冠軍嘅祖雲達斯以副選出擊，主場1比3不敵羅馬，球星C朗並冇入選大軍名單，佢全場做觀眾，眼白白睇住拉素前鋒恩莫比尼奪得意甲神射手及歐洲金靴獎2大個人殊榮。

賽前入31球嘅C朗喺射手榜落後恩莫比尼4球，可能教練沙利認為呢位葡萄牙巨星冇得追，干脆今場收起佢休息一下，留力踢8月8日凌晨歐聯16強次回合主場對里昂。

祖雲達斯半力出擊之下，雖然開波5分鐘就由希古恩打開紀錄，但羅馬之後由卡連歷扳平，加上柏洛迪梅開二度反勝3比1，兼打破埋祖記今季主場不敗之身。

至於拉素以1比3不敵拿玻里，恩莫比尼射入1球，今季聯賽累積入36球，追平希古恩喺2015/16年球季創下嘅意甲單季最多入球紀錄，同時力壓拜仁慕尼黑球星羅拔利雲度夫斯基，奪得今季歐洲金靴獎，亦係自2007年托迪之後，再次有意甲球員獲得呢項殊榮。