正在崩塌的王朝　祖記創3大羞恥數據

即上韓職刨績王：https://win.on.cc/football/league/kd1/rank.html　

祖雲達斯今季雖然有驚無險奪得意甲冠軍，實現9連霸壯舉，但同時卻創出3大羞恥數據，偉大王朝背後，已經開始出現崩塌嘅碎裂聲音。

祖雲達斯繼作客輸畀卡利亞里後，煞科戰主場1比3不敵羅馬，係球隊相隔832日後，首次主場輸波，佢上次聯賽主場輸波，已經係2018年4月22日不敵拿玻里。與此同時，祖記亦遭受1789日以來首次意甲2連敗。

最令祖雲達斯球迷擔心係球隊今季聯賽失咗43球，成為近62年失波最多嘅意甲冠軍，祖記以往以防守穩陣見稱，但隨住「BBC」防線逐一退下，新兵馬菲斯迪歷特不時犯錯，令祖記引以為傲嘅防線日漸消失，下季能否保住王者寶座成疑。

事實上，祖雲達斯今季只贏亞軍國際米蘭1分，係球隊意甲9連冠之中，同亞軍積分差距最少嘅1次，加上沙利領軍以來，戰術調動不時遭受批評，祖雲達斯王朝已經搖搖欲墜。