拿玻里例行公事整傷大將！仲點同巴塞鬥
20200802
東網電視
更多新聞短片
(Getty Images)
拿玻里喺周日(2日)凌晨意甲，雖然以3比1擊敗拉素，但卻付出沉重代價，主力球星兼隊長恩斯治尼喺比賽末段受傷，而且情況嚴重，好可能缺陣8月9日凌晨歐聯16強次回合作客巴塞隆拿。
今場波對拿玻里而言，只屬例行公事，因為無論輸贏，都篤定排第7位。不過，教練加度素仍然排出強陣出擊，由法比安彭拿、恩斯治尼、保列坦奴各入1球，以3比1擊敗拉素。
比賽踢到82分鐘，恩斯治尼喺無人防守之下，疑似拉傷肌似，即時痛苦倒地，軍醫入場為佢治療時，呢位29歲意大利國腳更不禁掩面痛哭，似乎情況非常嚴重。
恩斯治尼今季為拿玻里於各項賽事射入11球，佢擅長於左路突破，能傳擅射兼好扭得，有「意大利美斯」之稱，屬於拿玻里重要殺着。
拿玻里喺歐聯16強首回合同巴塞隆拿打和1比1，如果恩斯治尼無法出戰次回合，對拿玻里絕對係致命打擊。