紅魔DNA！蘇B想搵卡斯柏舒米高頂迪基亞

足球博彩神器，每日重心提供盡在《彩報》：http://win.on.cc/football/　

曼聯門將迪基亞喺英超重開之後，表現備受批評，特別係英足盃4強2次「派膠」連累球隊出局最為嚴重。

近期不斷傳出曼聯計劃棄用迪基亞嘅消息，根據英國《每日郵報》爆料，曼聯領隊蘇斯克查有意今夏簽入李斯特城門將卡斯柏舒米高頂替迪基亞。

雖然曼聯準備收回外借去錫菲聯嘅23歲門將甸恩軒達臣，但呢位新星獲得車路士垂青，未必會留效紅魔鬼，加上甸恩軒達臣經驗尚淺，曼聯下季要出戰歐聯，蘇斯克查更傾向搵身經百戰嘅卡斯柏舒米高把關。

卡斯柏舒米高由2011年效力李斯特城至今，曾為球隊爆冷奪得2015/16年英超冠軍，被譽為當今英超最佳門將之一。本來卡斯柏舒米高屬於「狐狸兵團」鎮山之寶，但由於佢已經33歲，球會方面都要為未來門將位置作出打算，如果曼聯提出收購，李城好大機會放人。

同埋卡斯柏舒米高係曼聯名宿舒米高嘅囝囝，去奧脫福繼承爸爸衣缽都係一件美好事情。