伊巴謙又入波！仲打破一項神級紀錄

足球博彩神器，每日重心提供盡在《彩報》：http://win.on.cc/football/　

AC米蘭喺周日(2日)凌晨意甲主場以3比0大勝卡利亞里，聯賽重開之後12場取得9勝3和，以第6位收咧。AC米蘭神鋒伊巴謙莫域又入1球，用半季時間轟入10球，兼以38歲零302日成為意甲史上單季入球達雙位數嘅最老球員。

AC米蘭開波初段靠卡利亞里後衞卡拉雲擺烏龍打開紀錄，臨完上半場A米原本有機會拉開紀錄，但伊巴謙莫域主射12碼，被門將卡格奴接實。不過，換邊之後伊巴謙莫域勁射破網，省番靚金漆招牌。轉個頭，森姆卡斯迪利祖為A米埋齋，送夠3隻蛋畀卡利亞里。

伊巴謙莫域1月重投AC米蘭之後，喺意甲上陣18場入10球，果然寶刀未老，AC米蘭總監馬甸尼表明，呢位瑞典名將下季仍然係球隊一部份，意味佢將會續約。