贊助商洩密！韋利安官宣片流出？
20200805
東網電視
更多新聞短片
近日盛傳車路士翼鋒韋利安，即將會以自由身轉投倫敦死敵阿仙奴，估計等車路士完成歐聯賽事後會有定論，不過阿仙奴官方贊助商之一嘅足球遊戲《Pro Evo》，日前意外流出一段疑似「官宣」影片，內容係遊戲入面嘅韋利安着住阿仙奴波衫出場，而且畫面仲有「新加盟」、「歡迎來到酋長球場」等字眼。
呢段疑似官宣影片係仍未出街嘅《PES 2021》遊戲畫面，呢隻新Game嘅開售日期暫定係9月15日，而阿仙奴3日前先啱啱為《PES 2021》做宣傳廣告，估計今次流出影片可能係阿仙奴同《PES 2021》合作整嘅官宣片。
英國媒體《The Athletic》記者David Ornstein透露，阿仙奴已向韋利安開出3年合約，雖然開出薪酬唔及美職及其他球會，但韋利安就畀阿迪達同總監伊度嘅誠意打動，更加屬意加盟「兵工廠」。
消息指韋利安加盟，意味米希達利恩將會正式轉會羅馬，呢位阿美尼亞國腳今季由阿仙奴外借羅馬表現出色，據報「兵工廠」將會畀佢自由轉會，「慳番」米希達利恩接近20萬鎊嘅周薪，拎嚟支付韋利安嘅13萬鎊周薪。