10年「傑志計劃」背後有喜亦有悲

2020年08月10日 21:05
東網電視
更多新聞短片
改變需要勇氣!「傑志尖子計劃」甫推出,即被指等同傑志與仁濟醫院董之英紀念中學合作的「傑志計劃」完結,雙方關係告終。惟伍健強調事實並非如此,形容「傑志尖子計劃」乃「傑志計劃」的強化版,可望為香港隊提供更多生力軍。
自2010年開始,傑志與董之英先後完成了6年及4年的合約,10年來耗資達1,600萬港元,每學年約有100名同學參與「傑志計劃」,當中成功投身職業足球者眾,包括李毅凱、鄭展龍、朱偉鈞、顏卓彬、袁世傑、潘沛軒、雷文迪、播磨浩謙、周家樂、謝偉俊和屠俊翹等等。「呢10年嘅合作畀到我哋好多寶貴嘅經驗,亦證明咗『學業+足球』呢個平衡發展嘅理念可行嘅。10年係一段好長嘅經歷,有喜有悲,但得着一定比損失嘅多。」伍健道。
「為咗將來提供更具質素嘅新血畀香港隊,計劃嘅內容要提升,方針亦要有調整。簡單啲講,就係過去將啲踢得唔好嘅同學,訓練到踢得好,依家就係將啲踢得好嘅同學,訓練到踢得出色。『傑志計劃』係告一段落咗,但佢進化成為咗『傑志尖子計劃』,入面亦都有唔少董之英嘅學生,實際情況絕對唔係有啲人所講嘅『關係告終』或者『劃清界線』,希望大家明白。」
上文中伍健談及過10年來有喜亦有悲,記者要求他舉出實例,結果這位傑志會長交出了大熱答案:「上年爆出嘅欺凌事件,令學校成為咗傳媒焦點,之後校監一句『過火的嬉戲』,更令校方畀人千夫所指,一直以嚟辛苦建立嘅聲譽,幾乎一鋪清袋。慶幸學期之後有九成幾學生繼續留校就讀,反映校內情況唔係好似好多人想像咁;而當時不斷喺唔同平台抹黑學校嘅嗰位老師,喺證據確鑿之下亦已經辭職;至於一度被惡意中傷嘅彭綺蓮校長,面對無理指控亦繼續配合調查,一直謹守崗位,成件事總算告一段落,既還校長清白,亦證明真金不怕洪爐火。」
另外,除「傑志計劃」孕育出多名職業球員,多名學員在on.cc東網的《傑志學界足球台》中,經受訓後擔任賽事評述有板有眼,以及修讀「創藝電影專修課程」的應屆DSE考生伍柏鴻,考獲6科共24分的佳績等,都為伍健會長及其團隊,帶來莫大鼓舞。