簽完長約即重傷！A山或提早收咧

足球博彩神器，每日重心提供盡在《彩報》：http://win.on.cc/football/　

國際米蘭打入歐霸盃4強，但亦付出沉重代價，早先至簽下3年合約嘅阿歷斯山齊士(A山)今場後備上陣，卻不幸拉傷右腳大腿肌肉，傷勢唔輕，恐怕就算國米打入決賽，佢都未必踢得。

A山64分鐘入替拿達路馬天尼斯，仲有1次勁射，僅被門將哈迪基擋出，可惜呢位智利國腳踢到比賽末段，拉傷右腳大腿肌肉，需要即時包紮，由於國米當時已經用晒3次換人機會，搞到臨尾踢少1人。

國米下場歐霸盃4強將於香港時間8月18日凌晨舉行，如果打入決賽，就會喺8月22日凌晨踢，拉傷肌肉可大可小，睇怕A山好難復出踢呢2場大戰。

阿歷斯山齊士今季被曼聯外借去國際米蘭，各項賽事上陣31場入4球及10次助攻，季尾表現大勇，獲得國米免轉會費正式簽入，以為會有好日子過，點知依家又受傷，真係黑仔。