UEFA唔查交換波衫！尼馬可踢歐聯決賽

足球博彩神器，每日重心提供盡在《彩報》：http://win.on.cc/football/　

巴黎聖日耳門(PSG)球星尼馬喺上場歐聯4強對RB萊比錫賽後，同對方球員侯斯頓保交換球衣，被指違反防疫安排，一度傳佢需要面臨隔離12日，缺席歐聯決賽。

不過，歐洲足協(UEFA)已經決定唔會調查今次事件，換言之，尼馬可以出戰決賽鬥拜仁慕尼黑。

根據英國《太陽報》日前報道，指歐洲足協公布咗31頁《恢復比賽議定書》，建議球員唔好交換球衣，以免增加新冠肺炎傳播風險，如果有球員違反規定，需要自我隔離12日。

歐洲足協得悉尼馬「違規」之後，終於作出回應，指唔會展開調查，意味放生呢位巴西國腳。事實上，如果尼馬缺陣決賽，難免影響賽事收視，後果可大可小，加上交換球衣之後，並冇造成播毒，UEFA惟有隻眼開隻眼閉。

不過，尼馬仲唔識收歛，佢喺社交網上載一張開派對嘅舊相，攞住印有RB萊比錫贊助商紅牛標誌嘅杯，話：「你老竇我要入決賽啦。」擺明趁機抽水，踩多對手一腳。