VVD見紅！利物浦熱身賽落後2粒追和
20200826
東網電視
更多新聞短片
新賽季爭取衞冕嘅利物浦，周二喺奧地利集訓嘅第二場熱身賽遇上挫折，對住薩爾斯堡竟然一度落後0比2，幾經辛苦逼和對手，雲迪積克更加踢到爆缸，中段離場。
紅軍開局以強陣出擊，沙拿、沙迪奧文尼再加羅拔圖法明奴，啱啱首度入選威爾斯嘅歷高威廉斯亦正選上陣。不過，薩爾斯堡喺開賽僅3分鐘，就由射手達卡入波領先1比0，跟住13分鐘，呢位21歲嘅贊比亞國腳梅開二度，紅軍只踢13分鐘已經落後兩粒。
下半場利物浦換入南野拓實，加強進攻，到53分鐘雲迪積克喺對方禁區爭頂，被對方球員手臂撞到面部，右眼角爆缸流血，經隊醫治療後，最終都要提早離場。其後，英媒指雲迪積克傷勢無大礙，唔會影響到周末社區盾對阿仙奴。
落後兩粒嘅利物浦，直至72分鐘，憑20歲小將利安比維斯達破蛋，再於81分鐘趁着對方後衞失誤，利安比維斯達再入多一粒，令紅軍作客逼和2比2，結束夏季集訓，全隊回國備戰社區盾。