【有片】基達菲簽兩猛人　劍指歐戰席位

足球博彩神器，每日重心提供盡在《彩報》：http://win.on.cc/football/　

西甲球隊基達菲近年喺主帥波達拉斯帶領下，出色發揮有目共睹，精明轉會操作，成為球隊成功嘅必要條件，今夏轉會窗基達菲就繼續引入實力猛將，分別揾嚟土耳其前鋒伊尼斯烏納，同埋哥倫比亞攻擊手古曹靴南迪斯，有望進一步加强前場火力。

早前球隊38歲老隊長兼箭頭人物佐治摩連拿宣佈離隊，轉投CF格蘭納達，為彌補前場空缺，基達菲就將目光轉向伊尼斯烏納，據報今次交易轉會費約900萬歐元。呢位土耳其前鋒，2017年由曼城加盟維拉利爾，首次登陸西甲賽場，其後曾經效力利雲特同華拉度列，雖然只係得23歲，不過已經累積唔少西甲經驗。

至於21歲嘅古曹靴南迪斯，2018/19賽季跟隨侯爾斯卡升上西甲嗰陣，已經證明自己有能力喺西班牙頂級聯賽立足。呢位上季效力馬略卡嘅哥倫比亞攻擊手場上表現不嬲夠晒搏命，同基達菲嘅熱血踢法非常夾，今次再以租借身份加盟基達菲，演出值得期待。