巴塞大敗之謎　梅拿：佢哋又遲到又hea

足球博彩神器，每日重心提供盡在《彩報》：http://win.on.cc/football/　

巴塞隆拿近期換教練，之後球王美斯要求離隊震動球壇，一切起因都係歐聯8強恥辱2比8大敗於拜仁慕尼黑而起，當日首開紀錄兼起孖嘅拜仁助攻王湯馬士梅拿講番當時情況，佢話熱身開始已睇到巴塞唔妥，因為對方又遲到又hea。

湯馬士梅拿表示：「當我見到巴塞球員出場時，我哋已經熱身咗10分鐘，佢哋睇落好放鬆，好似咩都唔在乎咁。」結果梅拿老實不客氣，開賽4分鐘就攻破巴塞大門，雖然巴塞喺7分鐘追和，但之後比列錫好快就再入波，基拿比擴大比數，梅拿再喺31分鐘攻入個人第2球，拜仁上半場已經贏到4比1，最終埋單炒8比2。

事情演變到美斯要求離開巴塞，歐洲各豪門準備接貨，不過湯馬士梅拿坦言，拜仁慕尼黑唔會搶埋一份：「美斯係近一世紀最佳球員，佢要求離隊，我都好想知佢會踢邊隊，不過拜仁對此應該做唔到任何嘢。」