英超冠軍 利物浦原陣衞冕默契夠

20200831
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
新一季英超於9月12日(下周六)開鑼,英超冠軍將於周二(1日)正式開售,利物浦上季以無敵姿態歷史性首次贏得英超冠軍,今季自然成為眾矢之的,不過曼城、曼聯、車路士今季冇受疫情影響積極擴軍,當中以車路士簽入多名猛將最來勢洶洶,絕對有機會繼2016/17球季後,再次將英超獎盃帶返倫敦。
利物浦上季拋離第2位嘅曼城18分,雖然未能打破英超歷來冠、亞軍積分最大差距紀錄,不過佢哋頭29場聯賽豪取27勝1和1負,全季6次失分有3次係喺宣布提早封王後錄得,論整體水準及表現依然一支獨秀。紅軍今季人腳變動不大,暫時只放走拉爾拉拿、洛夫雲兩名後備,補入希臘左閘迪斯米卡斯,將以上季奪冠嘅主力陣容進行衞冕,由於呢個班底大部分都處於當打年紀,經過多年合作,默契更上一層樓,自然成為紅軍今季衞冕最大本錢,冠軍目前有2.8倍相當值捧。
曼城針對性由般尼茅夫購入中堅尼敦阿基,堵塞防線漏洞,不過老將大衞施華離隊,上季失去高柏尼、缺少場上領袖嘅問題依然未解決,就算能夠成功簽入美斯,呢名阿根廷球王嚟到英超表現係點仲係未知數,現為1.43倍頂頭大熱似被過分吹捧。
曼聯上季中加入波基斯費南迪斯,成為下半季復甦、成功搶得歐聯入場券嘅轉捩點,荷蘭中場雲迪碧克盛傳即將加盟,中前場可謂如虎添翼,可惜中堅哈利馬古利、域陀連迪路夫或艾歷拜利都畀唔到人穩健信心,經常失大意波,係聯賽爭標路上嘅最大絆腳石,冠軍有9倍分頭亦不值博。
講買人車路士係今季英超最闊綽球隊,由上季中率先公布購入阿積士翼鋒薛耶治,到球季未完再羅致德國中鋒迪姆華拿,足證車仔今季圖強決心;上周佢哋再由李斯特城引入左閘芝維爾,並免費簽下巴黎聖日耳門中堅堤亞高施華,防守力量及經驗均得到提升,上季掀起嘅青春風暴有望進一步強化,加上仲有機會斟掂夏維斯,有力成為爭標一路奇兵,7.5倍不妨冷敲。
近10季英超冠軍
2019/20 利物浦
2018/19 曼城
2017/18 曼城
2016/17 車路士
2015/16 李斯特城
2014/15 車路士
2013/14 曼城
2012/13 曼聯
2011/12 曼城
2010/11 曼聯