等足5年　基亞利殊首入英格蘭國家隊

足球博彩神器，每日重心提供盡在《彩報》：http://win.on.cc/football/　

英格蘭早前公布最新國家隊名單，阿士東維拉中場基亞利殊落選最令人意外，不過隨住拉舒福特同哈利雲克斯先後退隊，英格蘭周一(31號)宣布補選基亞利殊入伍，令呢位24歲球星苦等5年後，終於實現成為英格蘭大國腳美夢。

基亞利殊青年軍嗰陣一直代表愛爾蘭出賽，踢過U17、U18同U21國家隊，5年前佢宣布放棄代表愛爾蘭，決心為英格蘭效力，但一直未獲國家隊垂青，上季佢喺維拉表現出色，創造機會次數喺英超僅次於曼城嘅奇雲迪布尼，被視為英格蘭最具創造力中場。

今次實現英格蘭大國腳美夢，基亞利殊表示：「5年前我已經諗住踢英格蘭，好開心依家終於夢想成真，第1次入選係最困難嘅一步，當我入國家隊後，就可以證明自己有能力長期佔據國家隊席位，我好有信心可以做到。」