李斯特城終於出手　打包阿特蘭大雙星

足球博彩神器，每日重心提供盡在《彩報》：http://win.on.cc/football/　

李斯特城將左閘芝維爾賣畀車路士之後，領隊羅渣士積極尋找代替品，目標係意甲阿特蘭大嘅卡斯泰尼。有傳雙方已經達成協議，轉會費高達2,150萬鎊(約2.3億港元)，將會簽下5年長約。

24歲嘅卡斯泰尼可以擔任左、右閘，2017年從比甲亨克加盟阿特蘭大。上季各項賽事上陣33場，取得2入球、3助攻。如果成事嘅話，卡斯泰尼將會係繼丹尼斯普拉特同泰利文斯之後，12個月之內球隊第3個加盟嘅比利時球員。

除此之外，李斯特城仲希望打包埋阿特蘭大中場魯賓高辛斯，呢位26歲德國中場上季各項賽事上陣43場，交出10個入波同8次助攻，表現相當唔錯，最近仲入選埋德國嘅歐國聯大軍名單。佢地兩位都係上屆阿特蘭大可以拎到聯賽第3名，以及殺入歐聯8強嘅功臣。

據報交易即將完成，等緊李斯特城官宣。阿特蘭大亦早有準備，希望喺羅馬借入荷蘭右閘卡斯杜柏，呢位25歲球員上屆畀羅馬外借返母會飛燕諾，目前為止只係為羅馬上陣過15場。