英軍新丁基亞利殊變臭四　畀保安玩殘

足球博彩神器，每日重心提供盡在《彩報》：http://win.on.cc/football/　

最新一期英格蘭國家隊近日召集，備戰對冰島同丹麥嘅歐國聯賽事，由於拉舒福特同哈利雲克斯退出，阿士東維拉中場基亞利殊就以替補身份，首次入選「三獅軍團」，呢位24歲天才中場近日滿心歡喜去到英軍訓練基地報到，點知一到埗就出現小插曲，被「拒於門外」。

話説基亞利殊着住一身阿士東維拉訓練衫，嚟到英格蘭國家隊訓練總部聖喬治公園，未入到基地範圍，就畀保安攔下問長問短，一度拒絕放行。

擾攘咗5分鐘，好彩最終都過到關同球隊會合，不過呢段小插曲似乎未有影響基亞利殊嘅心情，事後佢仲講笑咁，同球隊職員講述返成件事。

阿士東維拉過去一季英超成功護級，聯賽射入8球兼交出6次助攻嘅基亞利殊，絕對功不可沒，外界對佢入選英格蘭國家隊嘅呼聲亦愈嚟愈高。嚟緊兩場歐國聯大戰，呢位維拉10號仔，有望首次為英格蘭披甲，表現值得期待。