【官宣】破紀錄！狼隊3,500萬鎊簽18歲前鋒
20200906
東網電視
更多新聞短片
英超勁旅狼隊近年靠「葡萄牙幫」異軍突起，佢哋今個夏天決定繼續壯大葡國軍團，周日(6號)宣布以破球會紀錄嘅3,500萬鎊轉會費，收購波圖18歲前鋒法比奧施華，呢位新星出道以來只係喺葡超踢過1次正選，就獲狼隊重金收歸旗下。
狼隊今季無緣歐洲賽事，但無損佢哋組軍決心，今次付出嘅3,500萬鎊轉會費係球會紀錄，打破魯爾占美尼斯嘅3,000萬鎊舊紀錄。18歲嘅法比奧施華上季升上波圖一隊，喺葡超踢過12場入1球，當中只有1場係正選，但佢就成為波圖史上最年輕上陣球員同入球球員。
狼隊斥重金收購睇落冒險，不過狼隊主席施瑜就表示：「球隊嘅轉會團隊喺佢(法比奧施華)踢葡萄牙U16嗰陣已經密切注視，佢哋覺得施華係歐洲同齡球員中最有潛力嘅9號。法比奧施華好年輕，但已經有好高技術同好有足球智慧，由紐奴執教實在令人興奮，球迷一定會鍾意佢。」