專欄輪住嚟 咪詐型!大家就就啦!

20200906
東網電視
更多新聞短片
基於衞生考慮,愉園復操開始要求球員「自己裝備自己洗」。 (愉園fb圖片)
等到頸都長,會出戰復賽嘅6隊波,終於可以光明正大咁喺球場度練波喇,真係要同一直為咗「攞場」而東奔西跑、左問右唉嘅足總競賽部手足,講聲唔該喇!
6隊波喺啱啱嘅星期五開始,分兩日返番球場練波,傑志喺石門,東方龍獅同理文喺將軍澳基地,愉園同富力R&F喺九龍灣,而冠忠南區就喺番香港仔。由於幾個開放畀球隊練波嘅場地上限人數係每隊做咗登記嘅45位職、球員,加上對公眾衞生安全嘅考慮,所以喺復操呢段日子,傳媒行家係唔可以去現場探訪,啲料同相就要拜託球隊嘅宣傳部手足喇。
睇番各隊提供教練嘅訪問,幾乎全部都係覺得只有兩個星期去準備復賽係唔足夠,不過呻還呻,都要感恩嘅,一嚟啲球場得來不易,二嚟其實早喺董事會通過照踢復賽嗰陣,就已經講到明同政府攞場,攞唔攞到、幾時攞到同攞到邊度,足總一律冇Say。所以最後可以喺周五(4日)操得番,已經好難得。至於「兩個星期」,幾隊之前開會表決嗰陣,亦已經夾咗少過兩星期先唔制,有兩星期就可以接受。
操得番喇,踢唔踢得番呢?希望一切順順利利,直播見!
大頭