球王歸位！美斯周一返巴塞練波

足球博彩神器，每日重心提供盡在《彩報》：http://win.on.cc/football/　

一場轉會疑雲「大龍鳳」之後，美斯最終確認來季將會繼續留效巴塞隆拿。據西班牙《馬卡報》報道，呢位阿根廷球王通過病毒檢測，將於周一(7日)重返巴塞，參與球隊訓練。

自巴塞新帥朗奴高文執掌球隊帥印之後，一直深陷離隊風波的美斯，都冇喺訓練場蒲過頭。上周末球隊首度復操前嘅例行病毒檢測，美斯亦冇現身。不過隨住呢位阿根廷球星，透過新聞網站《Goal》專訪宣布留隊嘅消息，今次轉會風波總算告一段落，並有望於西班牙當地時間周一，重返巴塞訓練場恢復操練。

除咗球王美斯之外，早前喺歐聯4強，代表拜仁慕尼黑倒戈入波嘅菲臘比古天奴，亦已經番到巴塞參與季前備戰，而陣中其他國腳級球員，包括布斯基斯及安素法迪，將會喺國際賽期完畢後，重番巴塞大軍。上季西甲、歐聯同西盃三大皆空嘅巴塞，周六(12日)將會喺今季季前第一場熱身賽，面對塔拉戈納，屆時美斯將有機會登場。