丹尼路斯熱刺生涯倒數　或外闖尋出路

正在備戰新一季英超開鑼嘅熱刺，近期有唔少球員離隊，而30歲英格蘭左閘丹尼路斯，好有可能成位下一個出走嘅球員，據英國《太陽報》透露，熱刺領隊摩連奴已經決意放棄丹尼路斯，後者好大機會選擇外流。

丹尼路斯上季喺熱刺嘅出場機會極之唔穩定，加上頻頻受傷患困擾，令佢一直未能佔據正選位置，下半賽季仲畀借去紐卡素。喺近日由Aamazon製作的熱刺紀錄片《All or Nothing：Tottenham Hotspur》中，就見到呢位英格蘭左閘同領隊摩連奴激烈爭論嘅場面，其中前者就指責後者用人唯親，認為自己未得到應有嘅表現機會，其後丹尼路斯摔門而去，最終搞到不歡而散場面頗為尷尬，可見兩人關係認真麻麻。

2007年加盟熱刺嘅丹尼路斯，係呢支倫敦球隊入面資歷最深嘅老臣子，佢近期季前備戰期間雖然已經返番熱刺，不過就一直冇份同一隊一齊訓練。現時賴恩施斯隆同賓戴維斯，都可以勝任熱刺左閘，因此丹尼路斯將好難贏得正選位置。據報呢位英格蘭國腳，已經被摩連奴排除於熱刺來季計劃之外，正計劃去海外聯賽開展球員生涯新一頁。