狼隊又簽1位葡國兵！想變葡萄牙國家隊咩

足球博彩神器，每日重心提供盡在《彩報》：http://win.on.cc/football/　

狼隊近期頻頻出手簽人，最新公布借用波圖中場域陀馬查度，亦係今個月第3位加盟嘅葡萄牙球員，葡籍領隊紐奴似乎真係想將狼隊打造成葡萄牙國家隊。

狼隊月初先由艾斯杜尼簽入小將杜迪高美斯，日前再宣布以破球會紀錄嘅3,500萬鎊轉會費，收購波圖18歲前鋒法比奧施華，今次又係向波圖埋手，借用20歲嘅陀馬查度，並有權喺明年夏天買斷佢。

呢位葡萄牙U21小國腳上季為波圖上陣8次，狼隊主席施瑜大讚佢有前途：「域陀馬查度係1位令人興奮，而又好特別嘅年輕球員，能夠為球隊調動增加選擇，簽入佢亦顯示球會嘅雄心同未來策略。」

狼隊陣中有多位葡萄牙球員，除咗法比奧施華、域陀馬查度之外，仲有前鋒柏度尼圖、迪亞高祖達、中場摩天奴、魯賓尼維斯、後衞維拿基、門將魯爾柏迪斯奧等人。狼隊嘅葡國化政策亦好成功，升上英超之後近2季都獲得第7位。