PSG超殘陣輸波　法甲開季有排捱

足球博彩神器，每日重心提供盡在《彩報》：http://win.on.cc/football/　

因為應付歐聯賽事而延遲踢法甲嘅巴黎聖日耳門(PSG)，周五(11號)凌晨終於喺今季聯賽亮相，不過喺尼馬、基利安麥巴比、迪馬利亞、莫路伊卡迪、基羅拿華斯等7位主力確診新冠肺炎需要隔離下，PSG以超殘陣出戰新升班嘅朗斯，最後更因為龍門「派膠」作客慘輸0比1。

PSG喺大部份主力缺陣下，今場正選只有4個人有踢歐聯決賽，前線起用同樣只得18歲嘅艾迪爾同卡利穆恩度，雖然PSG今場仍然控制戰局，有接近8成嘅超高控球率，但因為經驗同默契不足而入唔到波，喺57分鐘更因為後備門將馬辛保爾卡送大禮，龍門球直接將個波掟畀朗斯前鋒加拿高射入，並以0比1落敗。

PSG周一(14號)凌晨又要喺法甲迎戰馬賽，王牌前鋒基利安麥巴比仍然要隔離，較早確診嘅尼馬同迪馬利亞等球星亦上陣成疑，教練杜曹賽後表示：「我唔知道佢哋可唔可以復出，就算出得又點？佢哋完全冇操練過，可以有咩表現？當然如果可以復出都係好事，或者我會畀佢哋一啲出場時間。」