PSG輸完波先知死　即將簽入羅馬右閘

足球博彩神器，每日重心提供盡在《彩報》：http://win.on.cc/football/　

巴黎聖日耳門(PSG)法甲第1場就意外輸波，據報球隊希望加強防守力，已經同意甲羅馬達成協議，以先借後買方式簽入意大利右閘費奧倫斯。今次合約將會以1+3形式，意味著PSG租借1年後，可以選擇用大約900萬鎊(約9千萬港元)買斷佢，並簽約3年。

PSG教練杜曹喺賽後被傳媒問到費奧倫斯轉會一事，佢都好誠實回答：「我都好想費奧倫斯嘅交易可以快啲完成！」羅馬隊長費奧倫斯，1月份意外畀球會外借到西甲華倫西亞，整季合共上陣32場，取得1個助攻。依位意大利國腳最近亦有入選意大利出戰歐國聯名單，打和波斯尼亞嘅賽事更正選踢足90分鐘。

29歲嘅費奧倫斯屬於PSG嘅Plan B，而球隊首選目標係比利連，可惜阿仙奴拒絕放人。有傳費奧倫斯聽日將會起程去巴黎，預計今個星期內會完成體測。